இழப்புகள் தரும் வலி

எந்த இழப்பும் இதயத்தைச் சுட்டெடுக்கும்:

நொந்துபோக வைக்கும் நொடிப்பொழுதில் – அந்தக்

கணத்தில் வலிதான்; மனத்தில் திடம்கொள்;

ரணத்தில் விழாது நட!

எதைநீ கொணர்ந்தாய்? எதைத்தான்நீ கொள்வாய்?

எதுவும் உனதல்ல இங்கே – அதனால்

இழப்புகள் ஏதுமில்லை; எண்ணம் தெளிக;

அழகாகும் உன்வாழ்க்கை ஆம்!

வாழ்க்கை நிலையல்ல; வாய்த்த பொருளும்தான்!

ஆழ்ந்தே இதைஉணர்ந்தால் ஆனந்தம் – வாழ்க்கையில்

வாடிக்கை ஆகும் வருவதும் போவதும்!

வேடிக்கை பார்த்து விடு!

                      - கோ. மன்றவாணன்