இனி ஒரு விதி செய்வோம்

     ரத்தத்தை ஆறாகப் பொங்க விட்டு

           நம்மக்கள் உயிர்பறித்து  மகிழு கின்றார் ;

     சித்தத்தைக் கொடும்விஷத்தில் தோய்த்தெ டுத்துத்

           தேசத்தை உருக்குலைக்க முயலு கின்றார் ;

     யுத்தத்தை நடத்துகின்றார் மறைந்து நின்றே ;

           உயிர்குடிக்கும் ஆயுதங்கள் குவித்து வைத்தே ;

     மொத்தத்தைப் பார்க்கையில் பயங்க ரத்தை

           முளையிலேயே கிள்ளிவிட விதியைச் செய்வோம்!

    

     பாரதத்தின் படைத்தளத்தில் நுழைந்து விட்டார் ;

           பயங்கரத்தின் வளர்ச்சியிது! பின்னே நிற்போர்

     யாரென்றே அடையாளம் கண்டு விட்டோம்

           இனிபொறுத்துக் கொண்டிருத்தல் மடமை ஆகும்.

     கோரப்பல் காட்டுகின்ற தீவி ரத்தை-

          கொடுமையே புரிகின்ற பயங்க ரத்தை

     வேரோடு பிடுங்கிவிட விதியைச் செய்வோம் !

          வெற்றிமணி ஓசையினை எங்கும் கேட்போம் !

     அன்புமனம் அனைவருக்கும் இருந்து விட்டால்

          அகிலத்தில் அமைதிப்பூ வாசம் வீசும் ;

     பண்புகுணம் நல்லொழுக்கம் யாவற் றையும்

          பாதுகாத்து நாம்வாழ்ந்தால் விலகும் தீமை ;

     நண்பர்களாய் அயலுறவு அமைந்து விட்டால்

          நல்லுதவிப் பரிமாற்றம் நிகழும் நித்தம் ;

     மண்புவியில் அப்படியோர் உலகைக் காண

           மனமொத்து விதிசெய்வோம் ; மகிழ்ந்து வாழ்வோம்!

     

                                               கோ. மன்றவாணன்