வாக்கு உன் செல்வாக்கு

    

    

o    உன்னைப் பார்த்துத்

            தலைவணங்கும் ராஜ மகுடங்கள்

            தேர்தலின்போது மட்டுமே

o    உன்

            கையில் உள்ள

            வாக்கு வடையைப் பறிக்க-

            ஆசை வார்த்தைகள் பேசி

            ஆடிப் பாடி மயக்கும்

            அரசியல் நரிகள்

o    “நீதான்

            நேரில் வந்த தெய்வம்” என

            உன்னை

            ஊட்டி வார்த்தைகளால் குளிர்வித்து-

            தலைமீது கைகுவித்துக்

            கும்பிடு போடும்

            கோவில் சொத்தை

            கொள்ளை அடித்த

            கும்பல்    

o    இரகசியமாய்

            பணம், பொருட்கள் கொடுத்து

            உன் வாக்கை

            வாங்கிக் கொள்ள

            வலைவிரிக்கும் புனித வேடர்கள்!

o    உன்

            காலில் விழுந்து வணங்கும்

            வெண்சட்டை மிளிரும்

            வெள்ளை பூதங்கள்

            குனிந்து பார்

            உனக்கே தெரியாமல்

            உன் விரல்கள் துண்டிக்கப்பட்டிருக்கும்.

o    “உதவி என்று வருவோர்க்கு

            என் வீட்டுக்கதவு

            எப்போதும் திறந்திருக்கும்”

            என்பார்

            உன் வாக்கை வாங்கும்வரை!

            வெற்றி பெற்றவரின்

            வீட்டு வாசலைப்

            போய்ப் பார்…

            பூட்டிய இரும்புக் கதவும்

            பாய்ந்து துரத்தும் நாய்களும்….

            - கோ. மன்றவாணன்