யார் மனிதன்?

யார் மனிதன்?

மனிதன் யாரெனக்

கண்டறியும் கருவியொன்று இல்லையெனக்

கவலையுறுகிறான் கடவுளும்.

சிறப்பு தரிசனத்தில்

சிலை அருகில் வருபர்களை

உற்றுப் பார்த்த அவன்

உதட்டைப் பிதுக்கவும் அஞ்சுகிறான்.

கடவுளே தானெனச் சொல்லி

உண்டியலை நிரப்பிக்கொள்கிறவர்களை

ஓரமாக நின்று பார்த்து

ஒருமுறை தன்னைச் சோதித்துக்கொள்கிறான்.

அனைத்துக்கும் ஆசைப்படு என்ற

அருளுரைக்குப்

பொருளுரை எழுதுவோரின்

பூசை அறைக்குள்ளிருந்து தப்பியோடத் துடிக்கிறான்.

கீழிறங்கி வந்து தேடி அலைந்தபின்

ஒப்புக்கொள்கிறான்

“மனிதனை

இன்னும் நான் படைக்கவில்லை” என்று!

-கோ. மன்றவாணன்