இரண்டாவது கோப்பை

தேநீர்க் கோப்பை வலது கையிலும்

திறந்த புத்தகம் இடது கையிலும்

இருப்பதே

எனது யோகாசனம்

தேநீர்ச் சுவையும்

வாசிப்பின் சுகமும்

மனதை மயக்கும் தேவதைகள்

மனைவி அழைத்த போதும்

மழலை சிரித்த போதும்

தெரிவதில்லை

தேநீர்க் கோப்பையின் அரவணைப்பில்

வாசிப்பில் மெய்மறந்த தருணம்

ஆவி பறந்தோடித் தப்பித்திருக்கும்

கோப்பையில் இருந்து

காலியான தேநீர்க் கோப்பையை

உதடு பொருத்தி உறிஞ்சி ஏமாறுதல்

ஒவ்வொரு நாளும் உண்டு

இரண்டாவது கோப்பை கேட்கையில் மட்டுமே

நிகழ்வுலகுக்குத் திரும்புதல்

நிகழ்கிறது

-கோ. மன்றவாணன்