Friday, 23 February 2018

கொண்டாடப்படும் தினங்கள்






           விழிபிடித்து அழைத்துச்செல்லும்
           விறுவிறுப்பான புதினத்தின் பக்கங்கள்தாம்
           ஒவ்வொரு நாளும்

           பூமி மாற்றி உடுத்தும்
           புத்தாடைகள்தாம்
           பருவ காலங்கள் யாவும்

           புவி
           புதுப்பித்துக்கொள்கிறது
           நாள்குளியல் செய்து

           வெற்றியாளர்கள்
           மெருகேறி மின்னுகிறார்கள்
           ஒவ்வொரு நாளையும் அலங்காரம் செய்து

           தாயைப் பழித்தவனையும் மன்னித்துவிடு
           தப்பவிடாதே
           நாளைப் பழிக்கும் சோதிடத்தை

           வானவில் அழகெனவே
           வசீகரித்து வண்ணம் பூசுகின்றன
           வார நாட்கள்

           நேற்று என்பது ஒத்திகை
           இன்று என்பது அரங்கேறும் நாடகம்
           நாளை என்பது விருதுபெறும் வைபவம் 

           உன்னை நம்பி உழை
           எல்லா நாட்களும்
           கொண்டாட்ட தினங்கள்தாம்


           கோ. மன்றவாணன்



No comments:

Post a Comment