பட்டாசு சத்தம்

அக்கம் பக்கத்து

வீட்டு வாசல்களில்

இடியோ

வெடியோ என

சிவகாசி பட்டாசு

சீறிச் சிதறுகிறது

தரையில் சுற்றும்

தங்கக் கிரகம்போல்

சுழன்று நகர்கிறது

சங்குச் சக்கரம்

ஒளிப்புனலை

வானை நோக்கிப் பீய்ச்சி அடிக்கிறது

கலசம்

சிரிப்பு உதிர்க்கும்

சின்னக் குழந்தைகளுக்குப் போட்டியாகச்

சிதற விடுகிறது

ஒளிச்சிரிப்பை

மத்தாப்பூ

காலி பாட்டலை ஏவுதளமாக்கி

விண்ணில் வளைந்து நெளிந்து

பாய்கிறது ராக்கெட்

குப்பத்துக்

குடிசை வீடுகளைப் பயமுறுத்திவிட்டு 

வெற்று அரசியல்வாதிகளின்

மேடைப் பேச்சைப்போல்

வேடிக்கை காட்டிவிட்டுத்

தெருவைக் குப்பையாக்குகிறது

ஊசிப் பட்டாசு

தன்வீட்டு வாசலில் மட்டும்

பட்டாசு சத்தம் கேட்கவில்லையே என

ஏங்கிய ஏழைச்சிறுமி

வெடிக்காத பட்டாசுகளின் மருந்துகளைச்

சேகரித்து வந்து

பொட்டலம் கட்டினாள்

பாதி எரிந்தவிந்த

திரியொன்றைப் பொருத்தித்

தீப்பற்ற வைத்தாள்

அவளுக்கு மட்டுமே கேட்குமாறு

அது புஸ்ஸென்று சத்தமிட்டு

அமுங்கிப் போனது

ஒடுக்கப்பட்டு

ஓரம் ஒதுங்கிய மக்களின்

நியாயக்குரலைப் போலவே…!

- கோ. மன்றவாணன்